ਬਿਉੂਰੋ, ਪ੍ਰਾਈਮ ਪੋਸਟ ਪੰਜਾਬ
ਅੰਮ੍ਰਿਤਸਰ, 28 ਅਗਸਤ 2022 : ਗਰਭ ਵਿਚ ਭਰੂਣ ਲਿੰਗ ਜਾਂਚ ਇਕ ਅਪਰਾਧ ਹੈ ਪਰ ਫਿਰ ਵੀ ਲੋਕਾਂ ਦੀ ਮਾਨਸਿਕਤਾ ਨਹੀਂ ਬਦਲ ਰਹੀ ਅਤੇ ਇਸ ਆੜ ਵਿੱਚ ਡਾ ਆਪਣੀਆਂ ਜੇਬਾਂ ਭਰਨ ਲਈ ਇਹ ਘਿਨੌਣਾ ਅਪਰਾਧ ਕਰ ਰਹੇ ਹਨ । ਇਸੇ ਤਰ੍ਹਾਂ ਦਾ ਮਾਮਲਾ ਅੰਮ੍ਰਿਤਸਰ ਤੋਂ ਸਾਹਮਣੇ ਆਇਆ ਹੈ ਜਿੱਥੇ ਪੀਐਨਡੀਟੀ ਦੀ ਟੀਮ ਨੇ ਭਰੂਣ ਲਿੰਗ ਜਾਂਚ ਦਾ ਪਰਦਾਫਾਸ਼ ਕਰਦਿਆਂ ਗੌਰਵ ਅਲਟਰਾਸਾਊਂਡ ਸੈਂਟਰ ਅੰਮ੍ਰਿਤਸਰ ਤੋਂ ਦੋ ਐਮਬੀਬੀਐਸ ਡਾਕਟਰਾਂ ਸਮੇਤ ਚਾਰ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਗ੍ਰਿਫਤਾਰ ਕੀਤੇ ਗਏ ਵਿਅਕਤੀਆਂ ਵਿੱਚ ਡਾਕਟਰ ਗੌਰਵ ਅਤੇ ਡਾਕਟਰ ਸੁਭਾਸ਼ ਸ਼ਾਮਲ ਹਨ। ਟੀਮ ਦੀ ਛਾਪੇਮਾਰੀ ਦੌਰਾਨ ਇਕ ਡਾਕਟਰ ਨੂੰ ਦਿਲ ਦਾ ਦੌਰਾ ਪੈਣ ਦੀ ਸ਼ਿਕਾਇਤ ‘ਤੇ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ।
ਪੀ.ਐਨ.ਡੀ.ਟੀ ਇੰਚਾਰਜ ਡਾ: ਦੀਪਕ ਕੰਬੋਜ ਨੇ ਦੱਸਿਆ ਕਿ ਅਲਟਰਾਸਾਊਂਡ ਰਾਹੀਂ ਭਰੂਣ ਲਿੰਗ ਜਾਂਚ ਦਾ ਕੰਮ ਪਿਛਲੇ ਕਾਫੀ ਸਮੇਂ ਤੋਂ ਅੰਮ੍ਰਿਤਸਰ ਵਿੱਚ ਚੱਲ ਰਿਹਾ ਸੀ। ਸ਼ਿਕਾਇਤ ਮਿਲਣ ‘ਤੇ ਸਿਰਸਾ ਦੇ ਅਧਿਕਾਰੀਆਂ ਨੇ ਅੰਬਾਲਾ ਦੇ ਸਿਹਤ ਅਧਿਕਾਰੀਆਂ ਨਾਲ ਸੰਪਰਕ ਕੀਤਾ ਅਤੇ ਛਾਪੇਮਾਰੀ ਕਰਨ ਲਈ ਟੀਮ ਤਿਆਰ ਕੀਤੀ। ਸਿਰਸਾ ਦੇ ਤਿੰਨ ਮੈਂਬਰ ਟੀਮ ਵਿੱਚ ਸ਼ਾਮਲ ਹੋਏ। ਟੀਮ ਵੱਲੋਂ ਇੱਕ ਡਿਕੋਏ ਤਿਆਰ ਕੀਤਾ ਗਿਆ ਸੀ।
ਅੰਮ੍ਰਿਤਸਰ ਦੀ ਮਹਿਲਾ ਨੀਲਮ ਨਾਲ ਸੰਪਰਕ ਕੀਤਾ। ਮਹਿਲਾ ਨੀਲਮ ਨੇ ਉਸ ਨੂੰ ਅੰਮ੍ਰਿਤਸਰ ਸਥਿਤ ਅਮਨ ਐਂਡ ਕਲੇਬ ਇਲਾਕੇ ਵਿੱਚ ਬੁਲਾਇਆ। ਇੱਥੇ ਉਸ ਨੇ ਡਿਕੋਏ ਦਾ ਸੰਪਰਕ ਆਪਣੇ ਪਤੀ ਸਤਨਾਮ ਨਾਲ ਕਰਵਾਇਆ। ਭਰੂਣ ਲਿੰਗ ਜਾਂਚ ਲਈ ਉਸਦਾ ਸੌਦਾ 45 ਹਜ਼ਾਰ ਵਿੱਚ ਤੈਅ ਹੋਇਆ।
ਟੀਮ ਸਤਨਾਮ ਮਹਿਲਾ ਡਿਕੋਏ ਨਾਲ ਅੰਮ੍ਰਿਤਸਰ ਸਥਿਤ ਗੌਰਵ ਅਲਟਰਾਸਾਊਂਡ ਸੈਂਟਰ ਪਹੁੰਚੀ। ਟੀਮ ਨੇ ਡਾ: ਗੌਰਵ ਅਰੋੜਾ ਅਤੇ ਡਾ: ਸੁਭਾਸ਼ ਅਰੋੜਾ ਨਾਲ ਸੰਪਰਕ ਕੀਤਾ। ਮੁਲਜ਼ਮ ਨੇ ਔਰਤ ਦੀ ਜਾਂਚ ਕੀਤੀ ਅਤੇ ਉਸ ਤੋਂ ਬਾਅਦ ਉਸ ਨੇ ਦੱਸਿਆ ਕਿ ਉਸ ਦੇ ਪੇਟ ਵਿੱਚ ਲੜਕਾ ਹੈ। ਅਜਿਹੇ ‘ਚ ਜਿਵੇਂ ਹੀ ਮਹਿਲਾ ਡਿਕੋਏ ਨੇ ਇਸ਼ਾਰਾ ਕੀਤਾ ਤਾਂ ਟੀਮ ਨੇ ਸਾਰਿਆਂ ਨੂੰ ਮੌਕੇ ‘ਤੇ ਹੀ ਫੜ ਲਿਆ ਅਤੇ ਅੰਮ੍ਰਿਤਸਰ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। ਮੁਲਜ਼ਮਾਂ ਨੇ ਜਾਂਚ ਤੋਂ ਪਹਿਲਾਂ ਹੀ 45 ਹਜ਼ਾਰ ਰੁਪਏ ਦੀ ਰਕਮ ਲੈ ਲਈ ਸੀ। ਇਸ ਤੋਂ ਬਾਅਦ ਮਹਿਲਾ ਨੀਲਮ ਦੇ ਕਬਜ਼ੇ ‘ਚੋਂ 9 ਹਜ਼ਾਰ ਰੁਪਏ ਬਰਾਮਦ ਕੀਤੇ ਗਏ ਹਨ। ਟੀਮ ਵਿੱਚ ਅੰਬਾਲਾ ਦੇ ਡਾ: ਬਲਵਿੰਦਰ ਕੌਰ, ਡਾ: ਹੇਤਰਥ, ਡਾ: ਲਵੀਸ਼ ਅਤੇ ਡਾ: ਸੁਖਪ੍ਰੀਤ ਹਾਜ਼ਰ ਸਨ |
