ਬਿਊਰੋ, ਪ੍ਰਾਈਮ ਪੋਸਟ ਪੰਜਾਬ
ਰਾਜਪੁਰਾ ਵਿੱਚ ਇੱਕ ਦਰਦਨਾਕ ਸੜਕ ਹਾਦਸੇ ਵਿੱਚ ਮਸ਼ਹੂਰ ਬਿਜ਼ਨੈੱਸਮੈਨ ਰਿੰਕੂ ਸੇਤੀਆ (42) ਅਤੇ ਉਨ੍ਹਾਂ ਦੀ ਪਤਨੀ ਸ਼ਾਲੂ ਸੇਤੀਆ (40) ਦੀ ਹਰਿਆਣਾ ਦੇ ਸ਼ਾਹਬਾਦ ਵਿੱਚ ਇੱਕ ਸੜਕ ਹਾਦਸੇ ਵਿੱਚ ਮੌਤ ਹੋ ਗਈ। ਦੋਵੇਂ ਆਪਣੀ ਮਲੇਸ਼ੀਆ ਤੋਂ ਆ ਰਹੀ ਧੀ ਨੂੰ ਏਅਰਪੋਰਟ ਲੈਣ ਜਾ ਰਹੇ ਸਨ, ਪਰ ਧੀ ਨੂੰ ਆਪਣੇ ਮਾਪਿਆਂ ਨੂੰ ਮਿਲਣਾ ਤੱਕ ਨਸੀਬ ਨਹੀਂ ਹੋਇਆ।
ਹਾਦਸੇ ਵਿੱਚ ਕਾਰ ਡਰਾਈਵਰ ਵੀ ਜ਼ਖਮੀ ਹੋ ਗਿਆ। ਉਸ ਨੂੰ ਸ਼ਾਹਬਾਦ ਦੇ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ। ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਥਾਣਾ ਸ਼ਾਹਬਾਦ ਦੀ ਪੁਲਿਸ ਨੇ ਮ੍ਰਿਤਕ ਜੋੜੇ ਦੀਆਂ ਲਾਸ਼ਾਂ ਨੂੰ ਕਬਜ਼ੇ ‘ਚ ਲੈ ਕੇ ਸਿਵਲ ਹਸਪਤਾਲ ‘ਚੋਂ ਪੋਸਟਮਾਰਟਮ ਕਰਵਾ ਕੇ ਵਾਰਸਾਂ ਦੇ ਹਵਾਲੇ ਕਰ ਦਿੱਤਾ।
ਜਾਣਕਾਰੀ ਮੁਤਾਬਿਕ ਰਾਜਪੁਰਾ ਦੇ ਪ੍ਰਸਿੱਧ ਉਦਯੋਗਪਤੀ ਅਤੇ ਸ਼੍ਰੀ ਕ੍ਰਿਸ਼ਨ ਭਜਨ ਮੰਡਲ ਦੇ ਮੁਖੀ ਰਿੰਕੂ ਸੇਤੀਆ, ਜਿਨ੍ਹਾਂ ਦੀ ਵੱਡੀ ਬੇਟੀ ਮਾਧਵੀ ਸੇਤੀਆ ਜੋ ਕਿ ਚਿਤਕਾਰਾ ਯੂਨੀਵਰਸਿਟੀ ਵਿੱਚ ਪੜ੍ਹਦੀ ਹੈ, ਪਿਛਲੇ ਦਿਨੀਂ ਯੂਨੀਵਰਸਿਟੀ ਦੇ ਟੂਰ ਪ੍ਰੋਗਰਾਮ ਲਈ ਮਲੇਸ਼ੀਆ ਗਈ ਸੀ।
ਉਨ੍ਹਾਂ ਨੇ ਸ਼ੁੱਕਰਵਾਰ ਸਵੇਰੇ 10 ਵਜੇ ਦਿੱਲੀ ਹਵਾਈ ਅੱਡੇ ‘ਤੇ ਪਹੁੰਚਣਾ ਸੀ। ਰਿੰਕੂ ਸੇਤੀਆ ਆਪਣੀ ਪਤਨੀ ਸ਼ਾਲੂ ਸੇਤੀਆ ਨਾਲ ਆਪਣੀ ਧੀ ਨੂੰ ਲੈਣ ਦਿੱਲੀ ਜਾ ਰਿਹਾ ਸੀ। ਉਹ ਸਵੇਰੇ ਪੰਜ ਵਜੇ ਰਾਜਪੁਰਾ ਤੋਂ ਘਰੋਂ ਨਿਕਲੇ। ਉਨ੍ਹਾਂ ਦਾ ਡਰਾਈਵਰ ਕਾਰ ਚਲਾ ਰਿਹਾ ਸੀ।
ਹਰਿਆਣਾ ਦੇ ਸ਼ਾਹਾਬਾਦ ‘ਚ ਨੌ ਗਾਜ਼ਾ ਪੀਰ ਨੇੜੇ ਇੱਕ ਹੋਰ ਕਾਰ ਤੇਜ਼ ਰਫ਼ਤਾਰ ਨਾਲ ਓਵਰਟੇਕ ਕਰ ਰਹੀ ਸੀ। ਇਸ ਕਾਰਨ ਕਾਰ ਡਰਾਈਵਰ ਤੋਂ ਬੇਕਾਬੂ ਹੋ ਕੇ ਸੜਕ ਵਿਚਕਾਰ ਡਿਵਾਈਡਰ ਨਾਲ ਟਕਰਾ ਕੇ ਦੋ-ਤਿੰਨ ਵਾਰ ਪਲਟ ਗਈ ਅਤੇ ਨੁਕਸਾਨੀ ਗਈ। ਹਾਦਸੇ ਵਿੱਚ ਪਤੀ-ਪਤਨੀ ਦੀ ਮੌਤ ਹੋ ਗਈ।
ਰਾਹਗੀਰਾਂ ਨੇ ਮੋਬਾਈਲ ਤੋਂ ਘਰਦਿਆਂ ਦੇ ਨੰਬਰ ਲੱਭ ਕੇ ਪਰਿਵਾਰ ਵਾਲਿਆਂ ਨੂੰ ਉਨ੍ਹਾਂ ਦੇ ਘਰ ਰਾਜਪੁਰਾ ਵਿਖੇ ਸੂਚਿਤ ਕੀਤਾ ਤਾਂ ਪੂਰੇ ਇਲਾਕੇ ਵਿੱਚ ਸੋਗ ਦੀ ਲਹਿਰ ਦੌੜ ਗਈ। ਪਰਿਵਾਰਕ ਮੈਂਬਰ ਆਪਣੀਆਂ ਗੱਡੀਆਂ ਵਿੱਚ ਬੈਠ ਕੇ ਸ਼ਾਹਬਾਦ ਲਈ ਰਵਾਨਾ ਹੋ ਗਏ।
ਜਾਣਕਾਰੀ ਅਨੁਸਾਰ ਮ੍ਰਿਤਕ ਰਿੰਕੂ ਸੇਤੀਆ ਦੀਆਂ ਦੋ ਧੀਆਂ ਹਨ। ਵੱਡੀ ਧੀ ਮਾਧਵੀ ਚਿਤਕਾਰਾ ਯੂਨੀਵਰਸਿਟੀ ਵਿੱਚ ਪੜ੍ਹਦੀ ਹੈ। ਛੋਟੀ ਕੁੜੀ ਕਨਲ ਇੱਕ ਪ੍ਰਾਈਵੇਟ ਸਕੂਲ ਵਿੱਚ ਪੜ੍ਹਦੀ ਹੈ। ਸ਼ੁੱਕਰਵਾਰ ਸ਼ਾਮ ਕਰੀਬ 4 ਵਜੇ ਦਿੱਲੀ ਏਅਰਪੋਰਟ ਤੋਂ ਘਰ ਪਹੁੰਚੀ ਧੀ ਮਾਧਵੀ ਦਾ ਰੋ-ਰੋ ਬੁਰਾ ਹਾਲ ਹੈ। ਉਹ ਆਪਣੇ ਆਪ ਨੂੰ ਕੋਸ ਰਹੀ ਹੈ ਕਿ ਨਾ ਤਾਂ ਉਹ ਮਲੇਸ਼ੀਆ ਜਾਂਦੀ ਅਤੇ ਨਾ ਹੀ ਉਸ ਦੇ ਮਾਪਿਆਂ ਦੀ ਸੜਕ ਹਾਦਸੇ ਵਿਚ ਮੌਤ ਹੁੰਦੀ।
ਰਿੰਕੂ ਸੇਤੀਆ ਅਤੇ ਉਨ੍ਹਾਂ ਦੀ ਪਤਨੀ ਦੀ ਮੌਤ ਤੋਂ ਬਾਅਦ ਹਰ ਪਾਸੇ ਹਾਹਾਕਾਰ ਮੱਚ ਗਈ। ਸਾਰਿਆਂ ਦੀਆਂ ਅੱਖਾਂ ਨਮ ਹਨ। ਇਸ ਦੇ ਨਾਲ ਹੀ ਛੋਟੀ ਧੀ ਭਰੀਆਂ ਅੱਖਾਂ ਨਾਲ ਇਕਟਕ ਸਾਰਿਆਂ ਨੂੰ ਵੇਖ ਰਹੀ ਹੈ, ਕਿਉਂਕਿ ਉਸ ਦੇ ਦਾਦਾ ਨੰਦ ਕਿਸ਼ੋਰ ਅਤੇ ਦਾਦੀ ਆਪਣੇ ਪੁੱਤਰ ਅਤੇ ਨੂੰਹ ਦੀ ਲਾਸ਼ਾਂ ਲੈਣ ਲਈ ਸ਼ਾਹਬਾਦ ਗਏ ਹੋਏ ਸਨ।
