ਬਿਉੂਰੋ, ਪ੍ਰਾਈਮ ਪੋਸਟ ਪੰਜਾਬ
ਚੰਡੀਗੜ੍ਹ– ਹਿਮਾਚਲ ਪ੍ਰਦੇਸ਼ ਦੇ ਕਾਂਗੜਾ ਜ਼ਿਲ੍ਹੇ ਦੀ 19 ਸਾਲਾ ਲੜਕੀ ਨੇ ਚੰਡੀਗੜ੍ਹ ਵਿੱਚ ਖੁਦਕੁਸ਼ੀ ਕਰ ਲਈ। ਲੜਕੀ ਚੰਡੀਗੜ੍ਹ ਵਿੱਚ NEET ਦੀ ਤਿਆਰੀ ਕਰ ਰਹੀ ਸੀ। ਮੌਕੇ ਤੋਂ ਕੋਈ ਸੁਸਾਈਡ ਨੋਟ ਨਹੀਂ ਮਿਲਿਆ ਹੈ ਅਤੇ ਘਟਨਾ ਦੇ ਕਾਰਨਾਂ ਦਾ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ। ਫਿਲਹਾਲ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਜਾਣਕਾਰੀ ਮੁਤਾਬਿਕ 19 ਸਾਲਾ ਸ਼ਗੁਨ ਸੈਕਟਰ-45 ਸਥਿਤ ਇਕ ਘਰ ‘ਚ ਰਹਿੰਦੀ ਸੀ। ਉਸ ਦੇ ਮਾਤਾ-ਪਿਤਾ ਹਿਮਾਚਲ ਦੇ ਕਾਂਗੜਾ ਦੇ ਹਰਸੀਪੱਟਨ ਸਥਿਤ ਆਪਣੇ ਘਰ ਗਏ ਹੋਏ ਸਨ। ਮੰਗਲਵਾਰ ਦੇਰ ਰਾਤ ਲੜਕੀ ਵੱਲੋਂ ਚਾਚਾ ਤੇ ਚਾਚੀ ਦਾ ਫੋਨ ਨਾ ਚੁੱਕਣ ‘ਤੇ ਘਟਨਾ ਦੀ ਜਾਣਕਾਰੀ ਮਿਲੀ। ਲੜਕੀ ਦਾ ਚਾਚਾ ਚੰਡੀਗੜ੍ਹ ਰਹਿੰਦਾ ਹੈ। ਚਾਚੇ ਨੇ ਘਰ ਆ ਕੇ ਪੁਲਿਸ ਕੰਟਰੋਲ ਰੂਮ ਅਤੇ ਪਰਿਵਾਰਕ ਮੈਂਬਰਾਂ ਨੂੰ ਘਟਨਾ ਦੀ ਸੂਚਨਾ ਦਿੱਤੀ। ਪੁਲਿਸ ਨੇ 19 ਸਾਲਾ ਸ਼ਗੁਨ ਨੂੰ ਫਾਹੇ ਤੋਂ ਹੇਠਾਂ ਉਤਾਰਿਆ ਅਤੇ ਉਸ ਨੂੰ ਜੀਐਮਸੀਐਚ-32 ਵਿੱਚ ਦਾਖ਼ਲ ਕਰਵਾਇਆ। ਇੱਥੇ ਡਿਊਟੀ ਡਾਕਟਰ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪੁਲਿਸ ਦੀ ਮੁੱਢਲੀ ਜਾਂਚ ਵਿੱਚ ਕਮਰੇ ਦੇ ਅੰਦਰੋਂ ਕੋਈ ਸੁਸਾਈਡ ਨੋਟ ਨਹੀਂ ਮਿਲਿਆ ਹੈ।
ਲੜਕੀ ਦੇ ਮਾਤਾ-ਪਿਤਾ ਤੋਂ ਇਲਾਵਾ ਉਸ ਦਾ ਇਕ ਵੱਡਾ ਭਰਾ ਹੈ। ਸ਼ਗੁਨ ਦੇ ਮਾਤਾ-ਪਿਤਾ ਕਾਂਗੜਾ ਸਥਿਤ ਆਪਣੇ ਘਰ ਗਏ ਹੋਏ ਸਨ ਅਤੇ ਸੋਮਵਾਰ ਸ਼ਾਮ ਨੂੰ ਉਨ੍ਹਾਂ ਦਾ ਭਰਾ ਡਿਊਟੀ ਲਈ ਕਾਲ ਸੈਂਟਰ ਗਿਆ ਹੋਇਆ ਸੀ। ਸੈਕਟਰ-44 ਵਿੱਚ ਰਹਿਣ ਵਾਲੇ ਚਾਚਾ-ਚਾਚੀ ਨੇ ਕਈ ਵਾਰ ਸ਼ਗਨ ਨੂੰ ਫੋਨ ਕੀਤਾ। ਜਵਾਬ ਨਾ ਮਿਲਣ ‘ਤੇ ਚਾਚਾ 9.30 ਵਜੇ ਲੜਕੀ ਦੇ ਕਮਰੇ ‘ਚ ਚਲੇ ਗਏ। ਕਮਰੇ ਦੇ ਬਾਹਰ ਕਈ ਵਾਰ ਆਵਾਜ਼ਾਂ ਮਾਰੀਆਂ ਅਤੇ ਫੋਨ ਕੀਤਾ, ਪਰ ਜਵਾਬ ਨਹੀਂ ਮਿਲਿਆ।
ਪੁਲਿਸ ਅਨੁਸਾਰ ਸ਼ਗਨ ਪੱਖੇ ਦੇ ਸਹਾਰੇ ਫਾਹੇ ਨਾਲ ਲਟਕ ਰਹੀ ਸੀ। ਇਸ ਤੋਂ ਬਾਅਦ ਉਸ ਦੇ ਮਾਤਾ-ਪਿਤਾ ਅਤੇ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। ਦੱਸਿਆ ਜਾ ਰਿਹਾ ਹੈ ਕਿ ਇੱਕ ਦਿਨ ਪਹਿਲਾਂ ਹੀ ਸਗੁਨ ਵੀ ਆਪਣੇ ਚਾਚੇ ਦੇ ਘਰ ਗਈ ਸੀ।
