ਬਿਊਰੋ, ਪ੍ਰਾਈਮ ਪੋਸਟ ਪੰਜਾਬ
ਮੋਹਾਲੀ : ਜਾਅਲੀ ਕੋਠੀ ਮਾਲਕ ਬਣਾ ਕੇ ਵੇਚਣ ਦੇ ਨਾਂ ‘ਤੇ ਇਕ ਵਿਅਕਤੀ ਤੋਂ 10 ਲੱਖ ਰੁਪਏ ਦੀ ਠੱਗੀ ਮਾਰਨ ਵਾਲੇ ਚਾਰ ਵਿਅਕਤੀਆਂ ਨੂੰ ਪੁਲਸ ਨੇ ਗ੍ਰਿਫਤਾਰ ਕੀਤਾ ਹੈ। ਇਹ ਕਾਰਵਾਈ ਸੋਹਾਣਾ ਪੁਲੀਸ ਵੱਲੋਂ ਕੀਤੀ ਗਈ। ਡੀਐਸਪੀ ਸਿਟੀ 2 ਹਰਸਿਮਰਨ ਸਿੰਘ ਬੱਲ ਨੇ ਦੱਸਿਆ ਕਿ ਪਿੰਡ ਨਗਰੀ ਦੇ ਵਸਨੀਕ ਗੁਰਸੇਵਕ ਸਿੰਘ ਨੇ ਪੁਲੀਸ ਨੂੰ ਦੱਸਿਆ ਸੀ ਕਿ ਉਸ ਦੇ ਸਾਥੀ ਦਵਿੰਦਰ ਸਿੰਘ ਵਾਸੀ ਪਿੰਡ ਉਰਨਾ, ਤਹਿਸੀਲ ਸਮਰਾਲਾ ਨੇ ਟ੍ਰਾਈਸਿਟੀ ਵਿੱਚ ਜਾਇਦਾਦ ਖਰੀਦਣ ਬਾਰੇ ਸੋਚਿਆ ਸੀ। ਇੱਕ ਜਾਣਕਾਰ ਨੇ ਉਸ ਨੂੰ ਅਰਵਿੰਦ ਕੁਮਾਰ ਸੂਰੀ ਅਤੇ ਯਾਦੂ ਨੰਦਨ ਸੂਰੀ ਨਾਲ ਮਿਲਾਇਆ। ਉਨ੍ਹਾਂ ਦੱਸਿਆ ਕਿ ਪੰਚਕੂਲਾ ਦੇ ਸੈਕਟਰ 21 ਵਿੱਚ ਉਨ੍ਹਾਂ ਦੇ ਪਿਤਾ ਯਸ਼ਪਾਲ ਸੂਰੀ ਦੇ ਨਾਂ ’ਤੇ ਮਕਾਨ ਹੈ ਅਤੇ ਦੋਵੇਂ ਇਸ ਨੂੰ ਸਸਤੇ ਭਾਅ ’ਤੇ ਵੇਚਣ ਲਈ ਤਿਆਰ ਹਨ। ਉਨ੍ਹਾਂ ਨੂੰ ਪੈਸੇ ਦੀ ਸਖ਼ਤ ਲੋੜ ਹੈ।
ਉਨ੍ਹਾਂ ਦੱਸਿਆ ਕਿ ਅਸਲ ਵਿੱਚ ਦੋਵੇਂ ਲੜਕੇ ਅਰਵਿੰਦ ਕੁਮਾਰ ਸੂਰੀ ਅਤੇ ਯਾਦੂ ਨੰਦਨ ਸੂਰੀ ਆਪਣੇ ਪਿਤਾ ਦੇ ਕਹਿਣੇ ਤੋਂ ਬਾਹਰ ਸਨ ਅਤੇ ਆਪਣੇ ਪਿਤਾ ਦੀ ਥਾਂ ਇੱਕ ਜਾਅਲੀ ਵਿਅਕਤੀ ਦਾ ਝਾਂਸਾ ਦੇ ਕੇ ਮਕਾਨ ਵੇਚਣ ਦੇ ਨਾਂ ’ਤੇ ਪੈਸੇ ਠੱਗਣਾ ਚਾਹੁੰਦੇ ਸਨ। ਇਸ ਕੰਮ ਲਈ ਦੋਵਾਂ ਲੜਕਿਆਂ ਨੇ ਮਨੀਸ਼ ਕੁਮਾਰ ਵਾਸੀ ਓਮ ਵਿਹਾਰ, ਉੱਤਰ ਨਗਰ ਦਿੱਲੀ, ਇੰਦਰਜੀਤ ਸਿੰਘ ਵਾਸੀ ਦਿੱਲੀ ਅਤੇ ਰਾਜਨ ਲਾਲ ਵਾਸੀ ਹੇਮਸ ਢਕੌਲੀ ਨਾਲ ਮਿਲ ਕੇ ਜਾਅਲੀ ਆਧਾਰ ਕਾਰਡ ਬਣਵਾ ਕੇ ਹੋਰ ਦਸਤਾਵੇਜ਼ ਤਿਆਰ ਕੀਤੇ। ਇੰਦਰਜੀਤ ਸਿੰਘ ਨੂੰ ਨਕਲੀ ਯਸ਼ਪਾਲ ਸੂਰੀ ਬਣਾਇਆ ਗਿਆ। ਯਸ਼ਪਾਲ ਸੂਰੀ ਦੇ ਨਾਂ ‘ਤੇ ICICI ਬੈਂਕ ‘ਚ ਫਰਜ਼ੀ ਬੈਂਕ ਖਾਤਾ ਵੀ ਖੋਲ੍ਹਿਆ। ਉਨ੍ਹਾਂ ਦੱਸਿਆ ਕਿ 15 ਮਈ ਨੂੰ ਉਕਤ ਮਕਾਨ ਨੂੰ ਐਰੋਸਿਟੀ ਵਿਖੇ ਵੇਚਣ ਲਈ 3.35 ਕਰੋੜ ਰੁਪਏ ਦਾ ਸੌਦਾ ਹੋਇਆ ਸੀ। ਦਸ ਲੱਖ ਰੁਪਏ ਬਿਆਨਾ ਵਜੋਂ ਵੀ ਲੈ ਲਿਆ। ਉਸ ਨੇ ਦੱਸਿਆ ਕਿ ਬਿਆਨਾ ਯਸ਼ਪਾਲ ਸੂਰੀ ਦੇ ਵਿਕਰੇਤਾ ਵਜੋਂ ਅਤੇ ਅਰਵਿੰਦ ਕੁਮਾਰ ਸੂਰੀ ਅਤੇ ਯਾਦੂ ਨੰਦਨ ਸੂਰੀ ਦੇ ਗਵਾਹਾਂ ਦੇ ਦਸਤਖਤਾਂ ਨਾਲ ਜਾਅਲੀ ਕੀਤੀ ਗਈ ਸੀ। ਉਨ੍ਹਾਂ ਦੱਸਿਆ ਕਿ ਬਾਅਦ ਵਿੱਚ ਜਦੋਂ ਉਹ ਘਰ ਦੇ ਮਾਲਕ ਨੂੰ ਮਿਲੇ ਤਾਂ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਅਸਲ ਯਸ਼ਪਾਲ ਸੂਰੀ ਨੂੰ ਸੌਦੇ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ। DSP ਨੇ ਦੱਸਿਆ ਕਿ ਇਸ ਸਬੰਧੀ ਸੂਚਨਾ ਮਿਲਣ ‘ਤੇ ਥਾਣਾ ਸੋਹਾਣਾ ਵਿਖੇ ਮਾਮਲਾ ਦਰਜ ਕਰ ਲਿਆ ਗਿਆ।
